NYC: Viđat beaivi

Lean ain veahá maŋŋonan bloggemiin, muhto dá lea hui oanehaččat mo viđat beaivi lei!

Olles beaivi manai ON-viesus guldalit sárdnideddjiid, sin hástalusaid iežaset guovlluin. Orru nu ollu maid galgá diehtit, muhto váttis čáhkkehit buot! Mo son lea leat Ban Ki-Moon, gii ferte olles máilmmis beroštit? Dahje Obama? Huff.. Mun livččen áigá heađáskit diekkár dilis..

Eahkeda ovdal ožžon diehtit ahte sámi nuorat besset buktit cealkámuša James Anayai, gii lea ON erenoamášdieđiheaddji! Lei suomabeale nuorra Anne Länsmann gii darvehii mu gáhta nalde gitta, ja muitalii munnje dan. Áidna váttisvuohta lei ahte munnos ledje dušše moadde diimmu čállit dan, ja dieđusge eŋgelasgillii! Mii bat das – de moai čavgiime hotellii dihtora ovdii!

Jurdilin gal ahte lea go áibbas riekta buktit cealkámuša «buot sámi nuoraid» ovddas, go ii leat albma ládje beassan ráhkkanit. Fertejin gulaskuddat duoin earáin geat leat dáppe Sámi ovddas, sihke Ruoŧas ja Suomas, ja mii bođiimet dan ovttaoaivilvuhtii ahte lea vearrát jus eat atte makkárge cealkámuša go vuos letnot ožžon dan vejolašvuođa! Cealkámuša vuođđun geavaheimme moai resolušuvnnaid mat ledje boađusin Troandima ja Likšu (Lycksele) nuoraidkonferánssain. Diein konferánssain ledje lagabui 200 sámi nuora, nu ahte dovden ahte lei buorre vuođđu buktit cealkámuša! Dađi bahábu ii ožžon sáhkavuorru leat guhkit go golbma minuhta.

James Anaya ja Youth Caucus jođiheaddji Jocelyn

Mun namuhin vealaheami mii dáhpáhuvvá sámiid vuostá, sihke ealáhusain ja muđui media bokte. Cuiggodin maid dan go oahpaheaddjioahput eai fála doarvái buori oahpahusa sámiid birra. Eambbo diehtu čoavddášii ollu dárbbatmeahttun vealaheami, mii dávjá vuolgá das go olbmot eai dovdda áššit – omd. mo boazodoallu doaibmá ja mii sámegiela hálddašanguovlu duođai lea! Dokumeantta almmuhuvvo go lean divodan giela! 🙂

Guldaleaddjit - eambbo govat bohtet!

Eahkes manaime moai Anniin suoma ON-ambassádii. Doppe maid diplomáhtat ja eará allagasat. Ja mis! Doppe oahpásmuvven albma somás Maori olbmáin. Sus ledje váikko man ollu evttohusat mo bargat omd. gielain ja kultuvrrain. Sii leat oainnat ieža hui bures lihkostuvvan dáinna bargguin New Zealanddas. Mun bovdejin su (belohahkii) boahtit Norgii muitalit midjiide mo sii barget, ja sus lei hui miella! Ja de dieđusge bovdehallen vel Indonesia álgoálbmotnuoraid riikkačoahkkimii, mii lea.. Juste fal, Indonesias. Dán geasi. Mo ipmašit olmmoš galgá ollet buot bargat?

Maŋŋelaš seamma beaivvi lei ges side-event Ruošša sámiid rivttiid birra. Valentina Sovkina, gii lea Ruošša Sámedikkii ovdaolmmoš, ákkastalai manin Ruošša sámiide lea dehálaš ásahit Sámedikkii. Dađi bahábu eai orron Ruošša eiseváldit, geat maid ledje čuovvume eventa, nu mielas diekkar ásahussii. Erenoamážit ii go das lea namma «parlameantta». Ruošša láhka ii gieldde gal diekkár ásahusaid, muhto lea Murmansk oblast guvernevra gii cakkáha ásaheami..  Manin? Dan ii leat buorre dadjat.

Anna (permaneantta foruma lahttu) ja nubbi Anna leaba rahkkaneame čállosa! 🙂

Suoma stáhta ja sámediggi dorjot Ruošša sámedikkii!

Maiddái eará guovllu ruoššat ledje boahtán gullat!

 

Advertisements
Dette innlegget ble publisert i Uncategorized og merket med , , , , . Bokmerk permalenken.

Legg igjen en kommentar

Fyll inn i feltene under, eller klikk på et ikon for å logge inn:

WordPress.com-logo

Du kommenterer med bruk av din WordPress.com konto. Logg ut / Endre )

Twitter picture

Du kommenterer med bruk av din Twitter konto. Logg ut / Endre )

Facebookbilde

Du kommenterer med bruk av din Facebook konto. Logg ut / Endre )

Google+ photo

Du kommenterer med bruk av din Google+ konto. Logg ut / Endre )

Kobler til %s